«وصلنى».. تطبيق مصري ينافس «Google Maps» ولا يحتاج إلى إنترنت
هناك من يخشى سؤال المارة عن مكان يصعب الوصول إليه، وآخر نفدت منه باقة الإنترنت ولا يستطيع البحث علي "Google Maps" أو تشغيل الـ"gps" لمعرفة الطريق، والأكثر يقف عاجزًا أمام الوصول لمكان لأول مرة، ففكر الطالبان بسام وجلال فى تطبيق "وصلني": "بيشتغل من غير إنترنت ومش هيخلى حد يتوه تانى".
"بسام يوسف" طالب فى الفرقة الثانية تجارة إنجليزى، وصديقه "جلال الدين" طالب فى كلية هندسة، عمل كل منهما فى عدة مجالات مختلفة وتعلّم شؤون كثيرة منها البرمجة والتصوير بجانب دراستهم، لكنهم شعروا أن عليهم تقديم شىء جديد يفيد كل فئات المجتمع، يقول "بسام" لـ"التحرير" عن وصلنى: "فكرنا فى حاجات كثيرة واستقرينا فى الآخر على فكرة أبلكيشن يساعد الناس إنها توصل لأى مكان بسهولة، ويحدد ليهم المواصلات المتاحة قدامهم، ويعرفهم سعر الأجرة كمان، وبدأنا التنفيذ لحد ما طلع وصلنى".
يتميز "وصلنى"بعدم الاحتياج إلى خدمة الإنترنت لاستخدامه، فمن لحظة تنزيله يمكنك معرفة المواصلات القريبة إليك، يشرح عنه "بسام" أكثر: "الناس بتعانى لما باقة موبايلها تخلص ومابتكنش عارفة تتحرك أزاى، ودا السبب اللى خلانا نشتغل على وصلنى إننا نطلع تطبيق سهل غير مكلف وممكن يستخدم فى أى وقت".
وعن سؤال كيف يعمل "وصلنى" دون إنترنت يقول بسام: "العميل هو اللى بيحدد المكان اللى عايز يروحه، فأول ما يفتح الأبلكيشن هيلقى خانة مكتوب فيها هو فين.. وخانة تانية رايح فين".
أكثر من ثلاثة أشهر متواصلة، عمل فيها "بسام وجلال" على "وصلنى" وخطوات تنفيذية وبحث أكثر، يقول "بسام": جلال كان شغال على برمجة الأبلكيشن وأنا كنت بنزل كل منطقة وأعرف المواصلات بتاعتها وثمن أجرتها، وبمساعدة جوجل برضو قدرنا ندخل كل البيانات للتطبيق".
ينوي "جلال وبسام" تطوير "وصلنى" والتجول فى كل منطقة على مستوى المحافظات حتى يستطيع العميل استخدامه فى أى مكان: "الأول عملناه على مستوى القاهرة والجيزة والمناطق المعروفة والأشهر، وناوين نكمل للمحافظات وكمان هنزل نسخة للموبيلات الأيفون".
