قال الإعلامي عمرو أديب: “في تقديري أن الأيام المقبلة الدولة قد تضطر لأخذ قرارات وإجراءات اقتصادية ومالية صعبة”.
قرارات اقتصادية صعبة
وأضاف خلال برنامج “الحكاية” المذاع علي قناة “إم بي سي مصر”: “الدولة المصرية مثلها مثل أي دولة في العالم في ظل الظروف الاقتصادية التي يمر بها العالم، وقد تضطر لاتخاذ قرارات اقتصادية صعبة”.
وتابع: “البنوك المركزية بترفع الفائدة ليه؟ لما بيكون فيه ارتفاع في الأسعار وهناك موجات تضخمية، والفيدرالي الأمريكي هو الآخر رفع الفائدة”.
رفع الفائدة
وأكد: “الناس كلها في مصر مستنية قرار البنك المركزي لرفع الفائدة، وأنا رأيي وتوقعي انهم هيرفعوا الفائدة، وبيتكلموا ان الفيدرالي الأمريكي هيرفع الفائدة 7 مرات تانيين، وجايز طارق عامر رئيس البنك المركزي ميعملش كده، ولكن لما الفيدرالي الأمريكي يرفع كل البنوك المركزية في العالم بترفع بسبب الارتباط بالدولار”.
قوة الجنيه أمام الدولار
واستطرد: “سؤال واضح هو الجنيه المصري قوته وسعره هي هي النهاردة زي من 4 أسابيع أو شهرين؟ الحقيقة ان الجنيه دلوقتي سعره قل والجنيه اللى في جيب الحكومة هو نفس الجنيه ولذلك انا مظنش انه هيفضل سعر الجنيه أمام الدولار ثابت، مفيش حاجة اسمها العالم يتغير حوالين مني واحنا نفضل ثابتين طبيعي ان الجنيه أمام الدولار هيتحرك، والغريب ان فيه ناس طالعة تشتكي من زيادة الاعتمادات الدولارية علشان الاستيراد، هو حد عارف حاجة في ظل الحرب الروسية الأوكرانية ولا الدولار هيبقى وضعه ايه؟”.
الأزمة الاقتصادية العالمية
وأكمل: “انا النهاردة بنكد عليكم بس بجد لازم نعيش الواقع احنا مخلقناش الحرب ولا الوباء ودي دولة بتصارع علشان تقف على رجليها، دي دولة طلبات شعبها اكتر بكتير من دخل البلد، فهل انتم متوقعين ان الدنيا الايام الجاية عسل ومسقسقة حنية لأ طبعا، حتي محمد العريان كان بينتقد المركزي الأمريكي بإنهم اتأخروا في رفع سعر الفائدة من أجل مواجهة التضخم وارتفاع الأسعار، ولكن في مصر الدولة تراعى البعد الإجتماعي ولكن بييجي وقت الأمور تفلت من ايديك والدواء دايما طعمه مر، ولكن علشان نخف وميجلناش حرارة لازم ناخد الدواء، العالم في أزمة والناس لازم تعرف والأزمة دي بتبهت وتنعكس علي بلدنا، ولازم نبقى عارفين الحكاية كويس”.
واستطرد: “الدواء البدري المر أحسن من التمن الاقتصادي الغالي البعيد، ولكن زي ما قال الرئيس السيسي أن أصحاب المعاشات ومحدودي الدخل ليهم معاملة تانية الدولة تشيلهم مش هما اللى يشيلوك وفر رقبتك وفي رقبة كل واحد في مصر، وفي رقبتنا ليوم الدين”.
ولفت: “أنا مش عارف ازاي احنا في الاقتصاد الحر سعر الجنيه ثابت أمام الدولار؟ لازم يكون فيه تحريك في ظل الظروف الحالية، ونصف قيمة الروبل الروسي نزلت بسبب الحرب، وانت كدولة متقدرش تلجم اللي بيحصل لذلك لازم تاخد الدواء دلوقتي، والدولة هي اللى هتفصل الإجراءات ودور المواطن أن يتفهم ايه اللى بيجري وليه، وانا عارف ان هذا الأمر مؤلم ولكن الحياة مؤلمة ولم نخترعها وهذا الألم تم تصديره لنا، هل انت متقدرش تزود البنزين الفترة القادمة أشك وصعب جدا أن تحافظ الدولة المصرية الأيام المقبلة علي نفس الوضع..الناس لازم تضحى الفترة الجاية واللى عنده عربية يبيعها واللى عنده شقة كبيرة يسكن في شقة صغيرة، وبيتكلموا أن الدليفري هيبقة بالحصان.. نحن في حرب والحرب دي ليها تبعات اقتصادية صعبة للغاية على العالم كله ومنها مصر”.
