نشرت الصفحة الرسمية للرئيس عبد الفتاح السيسى، بموقع التواصل الاجتماعى فيس بوك، مقتطفات من كلمته فى قداس عيد الميلاد المجيد بكنيسة المسيح بالعاصمة الإدارية الجديدة.
وقال الرئيس: “الافتتاح الجزئى للكاتدرائية النهاردة، ده رسالة كبيرة أوى من مصر، مش بس للمصريين.. لأ.. ولا حتى للمنطقة.. ده للعالم كل.. رسالة سلام.. ورسالة محبة، إحنا بفضل الله سبحانه وتعالى بنقدّم نموذج للمحبة والسلام بينّا وبين بعضنا.. هتخرج المحبّة وهيخرج السلام من مصر.. هيعُمّ العالم كله”.
وأضاف الرئيس: “صدّقونى.. دايماً بكرّر وبقول .. عُمر الشر وعُمر الخراب وعُمر التدمير وعُمر القتل.. لا يمكن يقدر أبداً يهزم الخير والبناء والمحبة والسلام.. لا يمكن”، وتابع الرئيس “يا ترى المحبة .. يا ترى الفرحة اللى احنا شايفينها دى.. تساوى كام.. تساوى إيه، ليه احنا مش شايفين الخير والسعادة بينّا وبين بعضنا.. ليه إحنا مش شايفين غير الأذى، خلّى بالكم، إنتم أهلنا، وإنتم منّنا، واحنا واحد، ومحدّش أبداً أبداً هيقدر يقسّمنا.. أبداً مش عايز أتكلّم فى أى آلام، الآلام بتؤذينا كلّنا”.
وأضاف الرئيس: “أنا سعيد إن إحنا موجودين هنا، وموجودين وأنتوا فرحانين كده، ويا رب يقدّرنا إن إحنا ندخّل الفرحة على كل الناس فى مصر، كل الناس، بدون تمييز، كل الناس، أنا بشكركم على حفاوة الاستقبال، تحيا مصر بيكم، تحيا مصر بالمصريين، تحيا مصر بالمصريين، كل سنة وأنتوا طيبين، وعام سعيد عليكم وعلينا وعلى الدنيا كلها”.
