وجّه الرئيس عبدالفتاح السيسي الشكر إلى هيئة قناة السويس على «الجهد الكبير المبذول والذي يبذل خلال الفترة المقبلة».
وجاءت كلمات السيسي خلال افتتاحه مشروعات قومية في محافظة الإسماعيلية، السبت، قائلًا: «خلال الأيام والأسابيع الماضية حدثت تطورات كتير، حسيت إني كل الكلام اللي بقوله إحنا مشينا بخطى جيدة جدا، ومش هنبيع خالص اللي نقدر نعمله بفضل الله نعمله، واللي منقدرش هنقول منقدرش، وإحنا ماشين كويس فعلا».
وأضاف السيسي: «اللي تم تنفيذه خلال الفترة الماضية، واللي حجم العمل اللي أنتم عملتوه يا شعب مصر حاجة عظيمة وحاجة تشرف».
وتابع: «حفر الـ4 أنفاق كان مخطط عملها في 12 سنة، إحنا بنتكلم بدأنا نتعاقد على المكن نوفمبر 2015 وبدأنا الشغل منتصف 2016»
واستكمل السيسي: «النهارده بنقول الكلام بعد ما تم إنجاز العمل اللي في الأنفاق، والنهارده عاملين دا 4 شركات مصرية والشغل 100% بخبراء ومهندسين وعمال مصريين، اشترينا المعدات من الخارج، والموضوع ده مش بسيط نعمل 4 أنفاق، وعملنا نفق الشهيد أحمد حمدي في كام سنة».
وتطرق السيسي للحديث عن سيناء، قائلًا: «سيناء أرضنا، والقوات المسلحة ستقوم بكل العنف، بكل العنف، بكل العنف، ولازم بفضل الله نضع حد للإرهاب الموجود فيها، وإحنا نموت كلنا ولا حد يقرب من أرضنا»
وتابع: «الموضوع مش بالكلام، مفيش أي تهديد خارجي تخافوا منه، كلامي قليل، مفيش تهديد خارجي، مبخافش إلا منكم أنتم يا مصريين، نتحدى الدنيا كلها إحنا مش أشرار مش متأمرين احنا مش طمعانين لا في خير حد ولا أموال حد ولا أرض حد، طمعانين في كرم ربنا هنفضل بنبني ونعمر».
وأضاف: «فيه تكليف من وزارة الإسكات الهيئة الهندسية لمشروع قومي تخطيط عمراني متكامل هيتم تنفيذه من 2 إلى 3 سنوات سواء إحنا موجودين أو لا، الشغل مبيقفش على حد الشغل يقف على شعب مصر».
وشدد على أن «الدفاع عن البلاد ليس بالكلام، لكن بالعرق والجهد والتضحية والدم، إحنا كمصريين اطمنوا ربنا بيساعد الصالحين اللي بيبنوا يعمروا ما بيضيعوش، إحنا لا نخرب ولا ندمر، ولا يتبقى إلا أنتم يا مصريين يبقى عندكم ثقة في أنفسكم».
