هاجم الإعلامي محمد الغيطي، مساء الثلاثاء، الدكتور علي عبد العال، رئيس مجلس النواب، بعد هجومه على مؤسسة الأهرام، وإعلانه مقاضته لصحيفة «المقال»، ورئيس تحريرها الكاتب إبراهيم عيسى؛ قائلًا: «هو أنا يبقى مطبلاتي، وليل نهار أمجد في طلة حضرتك البهية، يا إما ترفع عليّا قضية؟».
أضاف الغيطي، أَثناء تقديمه برنامج «صح النوم»، عبر فضائية «LTC»، «إحنا مش مرضى بالماسوخية ولا السادية، وأرجو أنك تكون عارف الفرق بينهم، بالعكس لما بتعمل حاجة كويسة بنُشيد، لكن أما نلاقيك بتغلط في اللغة العربية في ليلة عُرسك، وإنت رئيس برلمان مصر، أقول إنت رائع ومفوّه ولبقّ؟ ده إنت بتغلط في كل كلمة بتقولها».
تابع: «إنت فضحتنا بنطقك للغة العربية وإنت تجلس على رأس برلمان عمره 150 سنة، لما تيجي تقول خطاب تراجعه وتشكّله وتقف قدام المراية وتعمل بروفة عشان متبقاش فضيحة، عشان متعرناش، ووظيفتي دق ناقوس الخطأ».
