1- حببي طفلك في القراية من صغره , وصغره ده مش من وهوه في رابعة إبتدائي ولا حتي لما يبقى عنده اربع سنين , لأ صغره يعنى وهو عنده أربع شهور أشتري كتاب أو كتابين ورقه مقوي وخليه معاه دايما بيلعب بيه ومحطوط جمبه بشكل شبه دائم , قبل مينام دايما تفتحي الكتاب وتفرجيه الصور وتقوليله أسماء الحاجات الموجوده في الكتاب وأنتي بتشاوري عليها
2- عادة كل الأمهات بتلتزم بالنص المكتوب في الكتاب وهي بتقرأ القصة لأطفالها وبعد كده الكتاب مبيبقاش ليه لزمة عندها , ده لو أنتى عاوزه تطلعي إبنك ذو نظره آحادية للأشياء لكن لو عاوزه تبني عنده الإبداع وأن يشوف الحجات بأكتر من منظور ممكن تقرأيله كل يوم نفس الكتاب بس بقصة مختلفة عن اللي قبليها وممكن تقلبي القصة لأغنية وهكذا من أفكار إبداعية
3- من الحجات اللي مخليانا منعرفش نتعايش مع العالم اللي احنا فيه اننا عادة كنا بنقرأ قصص أو بنتفرج ع أفلام كل نهايتها سعيدة وان البطل أتجوز البطلة وأن البطل أنتصر على الأشرار وهكذا وده لا يتوافق بتاتا مع العالم اللي أحنا عايشين فيه فلازم نمحي من كل القصص اللي بنحكيها لأطفالنا “وعاشوا في تبات ونبات وخلفوا صبيان وبنات ”
“وأن البطل الجبار موت كل الأشرار ”
4- كل القصص اللي بنحكيلها لأطفالنا عادة بيبقي ليها نهاية وده بيموت القصة بالنسبة له فلو طفلك كبير شوية اديله تمرين انه يكمل القصة من خياله وممكن تحولي الكتاب من قصة 3 ورقات لرواية طويلة عريضة ممكن يقعد يكتب فيها 5 سنين
5- اسألي طفلك ديما فين الحاجات اللي موجودة في الكتب, وخليه دايما يشاور عليها اسألي على أسم الحجات وشكلها ولونها ولما يشاور على حاجه صح شجعيه مش تقوليله شاطر يا حبيبي بصوت بارد فاتر لأ , قومي وأتنططي وأفرحي وعامليه كأنه عبر المانش وجبيله حجات حلوه كتير وده هتخليه يتشجع انه يركز وأن يتفاعل معاكي ويجاوب ولو معرفش متبينيش يأسك أوي لأن ده بيعدم ثقته بنفسه
6-أديله معلومات في كل مره جديدة بيقره فيها نفس الكتاب
يعنى مثلا لو فيه كتاب والكتاب فيه صورة شمس
مرة هتقوليله أن دى شمس , مره تانية هتقوليله أن هى لونها أصفر مرة هتقوليله أن هي مدورة مرة هتقوليله أن هي بتنور الأرض ومرة هتقولي أن هي بتدفينا , ومره أن هي حجمها كبير جدا ومرة أن هي عبارة عن جسم متوهج , ومره أن سرعة الضوء اللي طالع منها أد إيه وهكذا ,
وبكده ممكن تطلعي من صفحة واحدة في كتاب لطفلك معرفة لا حصر لها
7- أشتريله الكتب وحطيها في علبة هدايا
8- عادة كل الناس نفسها أطفالها يبقوا كويسين في الحجات اللي هما فشلوا فيها يعني اللي معرفش يطلع دكتور بيبقى عاوز إبنه يطلع دكتور وهكذا بس لو أنت مش بتحب القراية ونفسك إبنك يحب القراية أسهل حاجة تعملها هو أنك تقرأ قدامه كتير وتقرأ بجد , خليه دايما يشوفك أنتي وباباه وأنتوا بتقروا
9- أجمل حاجة بقي في موضوع القراية ده هو أنك بتاخد طفلك في حضنك وأنت بتقراله وده بيلخص كل الحب والحنان والآمان والمعرفة اللي في العالم كله
