كشف المخرج علي عبد الخالق عن اعتذار الفنان يحيى الفخراني عن أداء شخصية الطبيب في فيلم (العار) والذي أداه الفنان الراحل محمود عبدالعزيز.
وأضاف أن (العار ده ليه قصة، هو من تأليف صديقي محمود أبو زيد من أيام المعهد ، وإحنا أصدقاء عيلة كمان، يعني عيلتي تعرف عيلته وأوقات بنبات عند بعض ، وبنحكي دايما لبعض عن أفكار الأفلام اللي بتجيلنا ، إلى أن جاءت فكرة فيلم العار وقالي إيه رأيك نعمله مع بعض ، بس معظم شركات الإنتاج رفضت إنتاج الفيلم ، وقالوا لأ ده فيلم فيه مخدرات وبلاش ، فمحمود قام بإنتاج الفيلم هو وأتنين من أصدقاءه) .
وتابع (عبدالخالق): ( كان نور الشريف في البداية عارف إنه هيعمل الدور بتاعه ، وبعد كده تم اختيار حسين فهمي ، ثم كان دور الأخ التالت هيعمله يحيى الفخراني ، وكان لايق عليه الدور ويبان إنهم أخوات ، لكن لما قرأ السيناريو ومحمود قعد أتناقش معاه في آخر مشاهد الفيلم ،رفض الفخراني الدور عشان كان صغير ) .
يضيف مخرج الفيلم: ( ابتدوا الموزعين يقولوا مش مهم مين هيعمل الدور التالت، كفاية نور الشريف وحسين فهمي دول فريق كبير أوي ، لكني حسيت أن الدور لايق علي محمود عبدالعزيز وحسيت إنه ممكن يعمل كوميديا كويس ، فقولت نجيبه ، وكانت شروطه إن مفيش كلمة تتشال من السيناريو مقابل إنه يعمل الفيلم ده بأي فلوس ) .
تحمس محمود عبدالعزيز لفيلم العار بمجرد قراءته للسيناريو واعتبره فرصة العمر بالنسبة له حيث كان يقدم من قبل أدوارا شريرة ، ورومانسية، ليدخل بهذا الفيلم في سياق مختلف، وهو ما أكد المخرج علي عبدالخالق، قائلا: (رغم إن حجم الدور في الفيلم كان أقل الأدوار بس محمود كان منور جدا، وبعد عرض الفيلم وصله إن ردود أفعال الجمهور كلها بتقول عليه إنه هايل) .
