قال الدكتور سعد الدين الهلالى، أستاذ الفقه بجامعة الأزهر، إن الإرهاب هو السلطان الجائر فى هذا العصر، مستشهدًا بحديث النبى صلى الله عليه وسلم “إن أفضل الجهاد كلمة حق عند سلطان جائر”، متابعًا: “لكن هما بيفسروا الحديث لأتباعهم على أن الحاكم هو السلطان.. لكن النهارده معدتش الحاكم هو السلطان.. لكن القانون والدستور هو السلطان.. والحاكم بينفذ الدستور والقانون.. لكن بتفسير العصر ودى وظيفتنا إننا ناخد النص ونفسره بحسب العصر والواقع اللى إحنا عايشينه”.
وتابع الهلالى، ببرنامج “كل يوم” المذاع عبر فضائية ON E، مع الإعلامى عمرو أديب: “ربنا خلق كل واحد فى عصره علشان كل جيل يفسر النص بواقعه.. وتفسير الحديث النهارده هو إن السلطان الجائر هو الإرهاب.. ليه؟.. لأنه سلطان متعرفش تتفاهم معاه.. وسلطان ملهوش كلمة وبيفرض رأيه عليك ومش بيديلك فرصة فى الحديث.. والنهارده أى حاكم معاصر فى الدولة المعاصرة بيتحاكم من قبل مجلس النواب.. والمحاكم الرسمية باعتبار أن فيه دستور وقانون”.
واستكمل سعد الدين الهلالى: “مطلوب مننا أن نواجه هذا السلطان الجائر بكلمة حق.. ولازم نوعى أولادنا ونوعى الشعب ونقول إن ده غلط ومرفوض، وإن هذا الفكر فرض الرأى على الآخر سلطان جائر”.
