الراجل و الست جنسان مختلفان تماما ً في كل حاجة شكلًا وموضوعًا، أي راجل أو ست مهما حاول أو حاولت التغيير من نفسها عشان تعبر عن حبها للجنس الآخر، فأكيد حتظهر لينا هوية اللي قدامنا سواء كان راجل أو ست ، عشان ببساطة في حاجات معينة مرتبطة بالراجل لوحده ، و حاجات معينة مرتبطة بالست لوحدها ، و حاجات لا يمكن تكون في الجنس الآخر و ده اللي بـيؤدي لحدوث الاختلاف.
دي شوية حاجات اتكعبلت فيها من دراستي وبحثي في علاقة المرأة بالراجل و استعنت بآراء ناس كتيرة منهم الخبراء في علم النفس ومنهم العامة من الناس ومنهم أهلي و صحابي ..حتلاقي حاجات فرضتها أفكار في المجتمع علي انها حقيقية لحد ماصدقنا إنها حقيقية و حاجات فيها فروق و هي اللي بتميز الراجل من الست في تصرفاتهم لو عرفناها و فهمانها هيبقي في لغة تواصل أوضح..
بيقولولك إنها حقيقة بس هي : الجواز وحش .
• الجواز حاجة جميلة و بالاحصائيات اثبتت إن المتجوزين :
– أصحاء أكتر
– أسعد
– بيكسبوا فلوس أكتر
– بيعيشوا أكتر
– و حياتهم الجنسية أحسن من الناس السينجل
الميديا دايما بتبينلك الناس السينجل عايشين حياتهم مليطة و مبسوطين و عندهم شغف و حياة جنسية متحلمش بيها بس المتجوزيين ..ااعع
• لو سألت واحد متجوز علاقتك الجنسية تمام ؟ حيقولك هههه أنا متجوز يا خفيف ..يا اهبل !
“لو مكنتش متجوز فده مش من مصلحتك لانك حتدخن علبتين و نص سجاير و حتخسر كل المميزات دي.”
بيقولولك إنها حقيقة بس هي : الرجالة مبتفهمش في أمور الستات .
معظم الكوافيرات العالمية و الأحسن حتلاقي اللي بيديروها: رجالة
• أحسن الطباخين = رجالة
• مدام بيعملوا حاجة واحدة هيركزوا و حيتميزوا فيها كمان ..ليه هما الاحسن ؟ عشان عندهم القدرة إن يركزوا في حاجة واااااحدة بس .
بيقولولك إنها حقيقة بس هي : الستات مبتعرفش تركز في حاجة واحدة و تعملها صح; فأكيد مش هتعرف تعمل كذا حاجة في نفس الوقت .
الست عندها خاصية السيرك :
• ممكن تبقي بتتفرج علي تلفزيون و بتشرب شاي و بتقرا و بتعمل حلويات و بتتكلم في تليفون و كل ده في وقت واحد .. و ممكن الراجل يحس إنها مش بتتفرج علي تلفزيون فيسحب الريموت و يحول
• حيلاقي صوت بيصوت اااااااااايه أنا كنت بتفرج !
ازااااي بتتفرجي إنتي بتعملي كذا و كذا
– هاااات الريموت
بيقولولك إنها حقيقة بس هي : الراجل ممكن يعمل أي حاجة و يسمعني في نفس الوقت.
لو الراجل بيعمل حاجة مش هيسمعك – مش هيسمع أي حاجة تانية
• الست بتفكر أنا MULTITASK يبقي هو كمان MULTITASK – الراجل يبقي قاعد في حاله بيقرا الجرنال و هي لوكلولولك و هو مش سااااامع كلمة واحدة من اللي بتقوله و ده بيخلي الستات غضبانين جدا: “اقفل برنامج قراية الجرنان و شغل برنامج انت حتسمعني دلوقتي “
= الراجل بعدها بيهنج
• لو هو بيعمل حاجة متديلوش معلومات مهمة و هو بيعمل حاجة ‘ عشان ده بيؤدي الي :
• إنك بتقعدي تقنعيه أنك قلتيله حاجة و هو مقتنع إنك مقلتيش و إنتي متاكده و عارفه إنك قلتي – ده بيكون السبب ان خاصيه السمع كانت off
• عشان كده لو راجل مثلا بيصلح حاجة و إنتي عماله تحكي و هو عمال يقولك اممم اها ..ايوة .. علي فكرة هو مش سامعك – نصيحة للرجالة وقف اللي بتعمله و اسمعها و كمل اللي بتعمله!
بيقولولك إنها حقيقة بس هي : الراجل بيقدر يفهمني من غير ما أتكلم ..
“ومن إحدى أساسيات تعامل المرأة مع الرجل ألا تعتمد على ذكائه فى فهم ما تريده هي منه، لأن ذاكرة الرجل تتابعية ولا يستطيع أن يفهم من بين السطور، وأنصح كل أمرأه إذا أرادت شيئا من الرجل فاطلبيه منه مباشرة ولا تترددي فهو لن يفهم الإيحاءات.”
– من كتاب الرجال من المريخ والنساء من الزهرة /من تأليف الطبيب النفسي الأمريكي جون غراي
بيقولولك إنها حقيقة بس هي : الراجل سي السيد و حيفضل سي سيد !
الفكرة هو ان المجتمع بلور الفكرة دي فبقت مثلث رعب في كل علاقة و الموضوع ببساطة هو المركب اللي عليها ريسين بتغرق في قاع البحر . نفس الكاتب في نفس الكتاب حاول يبسطها و شرحها كده :
“لا يمكن للرجل أن يتقبل قيادة المرأة، لأن الرجل فارس حتى لو عنده ثلاث سنوات، وعلى المرأة أن تكون أمام الرجل انقيادية حتى لو وصلت لأعلى المناصب.
لأن المرأة إذا اصبحت قيادية في البيت فالعلاقة بينهما ستكون سيئة جدا وممكن أن تصل للطلاق لا قدر الله ، وينبغي أن يظهر كل منهما للآخر الاحترام والتقدير والحب، فالمرأة هى أنثى أي هى الاحتواء والرقة، يجب تظهر لزوجها ضعفها وليس قيادتها، وكذلك عليها أن تشعره بأنه فارس كما أنه يحتاج للحب والرعاية والاهتمام.
فكلنا نعرف إن الحب بالنسبة للمرأة مشاعر، كلام، مكالمات كثيرة، ورود و زهور، تقدير، اهتمام، رعاية، رسائل رومانسية كثيرة، أما بالنسبة للرجل فهو أن تكون زوجته أنثى فى المقام الأول وكذلك: الثقة، التقدير، الاحترام، العطاء، الكلام العاطفي وليس بكثرة.”
بس خلاص ! بلاش يا فوزية تتسرعي قبل ما تحكمي و تعرفي الدافع اللي ورا كل رد فعل عند الراجل و أنت برضه يا سي سيد أفهمنا عشان احنا محتاجين كتالوج و هي كانت نسخة واحدة و اتخطفت في جزيرة مهجورة و محدش لقاها لحد دلوقتي ..
