علق الفنان شريف رمزى، على قرار مصلحة الضرائب المصرية بإخضاع خدمات التعليم الدولى لضريبة القيمة المضافة الجديد، ضمن مشروع القانون المقدم من وزارة المالية لمجلس النواب، بأنه قرار “عبث العبث”، موضحا أن الطبقة المقتدرة التى تساعد البلد على النهوض سوف تنفجر بسبب القرارات التى تتخذها الحكومة خلال الفترة الأخيرة.
ودون رمزى عبر صفحته الشخصية على موقع التواصل الاجتماعى “فيس بوك”، قائلا “أنا نادر جدا لما بكتب أى حاجة على فيس بوك وبحب أحتفظ بآرائى لنفسى أو لحياتى الخاصة، لكن سمعت أن الدولة عايزة تفرض ضريبة على التعليم الأجنبى، وده لو حقيقى إحنا كده فعلا فى عبث العبث، وأحب أقول أن الطبقة المقتدرة الوحيدة إللى موقفة البلد على رجلها لحد دلوقتى من كتر ما البلد عمالة تحلب فيها ضرائب ورسوم وبلاوى زرقاء مبقتش مقتدرة وقريب جدا حتنفجر”.
فيما علقت الفنانة هنا شيحة على القرار عبر تدوينة لها على موقع التواصل الإجتماعى “تويتر”، “ضريبة إيه على التعليم، التعليم الدولى، إنترناشونال يعنى، ما هو لو تعليم محلى محترم كنا دخلنا فيه، إحنا مجبرين على الدولى، وبعدين بقى ضريبة على إيه، وبعدين فين الخدمات اللى بندفع ضرائب علشان ناخدها؟، فين التأمين الصحى المحترم؟، فين التعليم الجيد؟، فين الشوارع اللى مش مكسرة؟، خلونا ساكتين، قرف مغلى، إحنا ناقصين”.
